kahan aapko bhi gawara tha main

kahāñ aap ko bhī gavāra thā maiñ

nahīñ jis ghaḌī tak tumhārā thā maiñ

fanā ho ga.ī mujh meñ ik ḳhānqāh

kabhī ek raushan idāra thā maiñ

nahīñ ab kisī bhī zamīñ ko qubūl

kabhī terī āñkhoñ kā taara thā maiñ

havā ke nagar meñ diye kī bisāt

tire shahr meñ be-sahārā thā maiñ

bahā kar mujhe le ga.ī ik nadī

jise zo'm thā vo kināra thā maiñ

kisī lafz-e-kāmil ko pahuñchā nahīñ

safar-dar-safar isti'āra thā maiñ

miTe yuuñ mirī zaat ke sab nishāñ

ki jaise koī abr-pāra thā maiñ

zamīñ-dar-zamīñ aur falak-dar-falak

zarā sā yuuñ hī kitnā saarā thā maiñ

kahan aap ko bhi gawara tha main

nahin jis ghaDi tak tumhaara tha main

fana ho gai mujh mein ek KHanqah

kabhi ek raushan idara tha main

nahin ab kisi bhi zamin ko qubul

kabhi teri aankhon ka tara tha main

hawa ke nagar mein diye ki bisat

tere shahr mein be-sahaara tha main

baha kar mujhe le gai ek nadi

jise zo'm tha wo kinara tha main

kisi lafz-e-kaamil ko pahuncha nahin

safar-dar-safar isti'ara tha main

miTe yun meri zat ke sab nishan

ki jaise koi abr-para tha main

zamin-dar-zamin aur falak-dar-falak

zara sa yun hi kitna sara tha main