کہاں ہے اپنی منزل اور کسے منزل سمجھتے ہیں

کہاں ہے اپنی منزل اور کسے منزل سمجھتے ہیں

نہ اتنا ہوش ہے ہم کو نہ یہ اے دل سمجھتے ہیں

محبت میں کسے آساں کسے مشکل سمجھتے ہیں

نہ اتنی ہے سمجھ ہم میں نہ یہ اے دل سمجھتے ہیں

شب غم کی مصیبت میں ہمارے کام آتا ہے

خیال یار کو ہم مہربان دل سمجھتے ہیں

تلاش یار میں کیوں در بدر کی خاک ہم چھانیں

ہم اپنے خانۂ دل کو تری منزل سمجھتے ہیں

تمہارے حسن دل کش پر مٹے جاتے ہیں دیوانے

نہ جاں کو جاں سمجھتے ہیں نہ دل کو دل سمجھتے ہیں

کچھ ایسی روشنی ہوتی ہے ان کی شام فرقت میں

ہم اپنے دل کے داغوں کو مہ کامل سمجھتے ہیں