kahan ye tab ki chakh chakh ke ya gira ke piyun

kahāñ ye taab ki chakh chakh ke yā girā ke piyūñ

mile bharā huā sāġhar to DagDagā ke piyūñ

hazār talḳh ho pīr-e-muġhāñ ne jab dī hai

ḳhudā na-karda jo maiñ muñh banā banā ke piyūñ

mazā hai bāda-kashī kā vahīñ to ai saaqī

piyūñ jo ab to tire āstāñ pe aa ke piyūñ

baġhair jalva dikhā.e rahe na ye ma.ashūq

jo saat parde ke andar use chhupā ke piyūñ

maiñ vo nahīñ ki ḳhud apne qadah kī ḳhair manā.ūñ

piyūñ to bazm meñ das pāñch ko pilā ke piyūñ

zamīñ pe jaam ko rakh de zarā Thahar saaqī

maiñ tujh pe huuñ luuñ tasadduq to phir uThā ke piyūñ

vo mai-kada hai na saaqī hai kuchh na pūchho 'shād'

maiñ kis ke ghar meñ piyūñ kis ke ghar se lā ke piyūñ

kahan ye tab ki chakh chakh ke ya gira ke piyun

mile bhara hua saghar to DagDaga ke piyun

hazar talKH ho pir-e-mughan ne jab di hai

KHuda na-karda jo main munh bana bana ke piyun

maza hai baada-kashi ka wahin to ai saqi

piyun jo ab to tere aastan pe aa ke piyun

baghair jalwa dikhae rahe na ye mashuq

jo sat parde ke andar use chhupa ke piyun

main wo nahin ki KHud apne qadah ki KHair manaun

piyun to bazm mein das panch ko pila ke piyun

zamin pe jam ko rakh de zara Thahar saqi

main tujh pe hun lun tasadduq to phir uTha ke piyun

wo mai-kada hai na saqi hai kuchh na puchho 'shad'

main kis ke ghar mein piyun kis ke ghar se la ke piyun