kahani mein chhoTa sa kirdar hai

kahānī meñ chhoTā sā kirdār hai

hamārā magar ek me.aar hai

ḳhudā tujh ko sunñe kī taufīq de

mirī ḳhāmushī merā iz.hār hai

ye kaise ilāqe meñ ham aa base

gharoñ se nikalte hī bāzār hai

siyāsat ke chehre pe raunaq nahīñ

ye aurat hamesha kī bīmār hai

haqīqat kā ik shā.iba tak nahīñ

tumhārī kahānī mazedār hai

ta.alluq kī taj.hīz-o-takfīn kar

vo dāman chhuḌāne ko tayyār hai

paḌosī paḌosī se hai be-ḳhabar

magar sab ke hāthoñ meñ aḳhbār hai

ye chhuTTī kā din ham se mat chhīnnā

yahī ham ġharīboñ kā tyauhār hai

use mashvaroñ kī zarūrat nahīñ

vo tum se ziyāda samajhdār hai

kahani mein chhoTa sa kirdar hai

hamara magar ek mear hai

KHuda tujh ko sunne ki taufiq de

meri KHamushi mera izhaar hai

ye kaise ilaqe mein hum aa base

gharon se nikalte hi bazar hai

siyasat ke chehre pe raunaq nahin

ye aurat hamesha ki bimar hai

haqiqat ka ek shaiba tak nahin

tumhaari kahani mazedar hai

talluq ki tajhiz-o-takfin kar

wo daman chhuDane ko tayyar hai

paDosi paDosi se hai be-KHabar

magar sab ke hathon mein aKHbar hai

ye chhuTTi ka din hum se mat chhinna

yahi hum gharibon ka tyauhaar hai

use mashwaron ki zarurat nahin

wo tum se ziyaada samajhdar hai