kahin gireban koi chaak hone wala hai

kahīñ girebāñ koī chaak hone vaalā hai

ye hādsa sar-e-aflāk hone vaalā hai

pahuñch rahā huuñ kisī bhed ke bahut nazdīk

ki jaise apnā hī idrāk hone vaalā hai

utarne vaalī hai ab os din ke jaane par

añdherā shaam kā namnāk hone vaalā hai

hai sard itnā makāñ ab kī baar jaaḌe meñ

badan bhī aag kā ḳhāshāk hone vaalā hai

kuchh aa rahā hai asar mai kā us kī bātoñ meñ

ye lag rahā hai vo be-bāk hone vaalā hai

ba-ġhaur dekh rahā huuñ maiñ us kā tarz-e-amal

vo kār-e-ishq meñ chālāk hone vaalā hai

maiñ aap apnī ḳharābī kā huuñ sabab 'shāhīñ'

jo ḳhud banāyā thā ab ḳhaak hone vaalā hai

kahin gireban koi chaak hone wala hai

ye hadsa sar-e-aflak hone wala hai

pahunch raha hun kisi bhed ke bahut nazdik

ki jaise apna hi idrak hone wala hai

utarne wali hai ab os din ke jaane par

andhera sham ka namnak hone wala hai

hai sard itna makan ab ki bar jaDe mein

badan bhi aag ka KHashak hone wala hai

kuchh aa raha hai asar mai ka us ki baaton mein

ye lag raha hai wo be-bak hone wala hai

ba-ghaur dekh raha hun main us ka tarz-e-amal

wo kar-e-ishq mein chaalak hone wala hai

main aap apni KHarabi ka hun sabab 'shahin'

jo KHud banaya tha ab KHak hone wala hai