kahne aae the kuchh kaha hi nahin

kahne aa.e the kuchh kahā hī nahīñ

chal diye jaise kuchh sunā hī nahīñ

is qadar zulm ibn-e-ādam par

jaise us kā koī ḳhudā hī nahīñ

ham jamā kar nigāh baiThe haiñ

apnī qismat kā dar khulā hī nahīñ

fikr āġhāz hī kī hai sab ko

koī anjām sochtā hī nahīñ

tere maqtal meñ aa ga.e āḳhir

aur kuchh ham ko rāsta hī nahīñ

vo tire naqsh-e-pā ko kyā samjhe

jis kā sajde meñ sar jhukā hī nahīñ

tū kitāboñ meñ DhūñDhtā kyā hai

ishq kī chāra-gar davā hī nahīñ

jis ko siine se ham lagā lete

ham ko aisā koī milā hī nahīñ

aur ab jī ke kyā kareñ 'asġhar'

ab to jiine meñ kuchh mazā hī nahīñ

kahne aae the kuchh kaha hi nahin

chal diye jaise kuchh suna hi nahin

is qadar zulm ibn-e-adam par

jaise us ka koi KHuda hi nahin

hum jama kar nigah baiThe hain

apni qismat ka dar khula hi nahin

fikr aaghaz hi ki hai sab ko

koi anjam sochta hi nahin

tere maqtal mein aa gae aaKHir

aur kuchh hum ko rasta hi nahin

wo tere naqsh-e-pa ko kya samjhe

jis ka sajde mein sar jhuka hi nahin

tu kitabon mein DhunDhta kya hai

ishq ki chaara-gar dawa hi nahin

jis ko sine se hum laga lete

hum ko aisa koi mila hi nahin

aur ab ji ke kya karen 'asghar'

ab to jine mein kuchh maza hi nahin