kaho tum kis sabab ruThe ho pyare be-gunah hum sin

kaho tum kis sabab rūThe ho pyāre be-gunah ham siiñ

churāne kyuuñ lagī haiñ yuuñ tirī añkhiyāñ nigah ham siiñ

itī nā-mehrbānī kyuuñ karī nāhaq ġharīboñ par

kiyā kyā ham niiñ zālim apne jī kī baat kah ham siiñ

kyā thā naqd-e-jāñ apnā nisār is vāste tum par

ki be-taqsīr yuuñ dil meñ rakhoge tum girah ham siiñ

taġhāful chhuḌnā zālim be-takalluf ho sitam mat kar

kapaT kī āshnā.ī ye nahīñ saktī nibah ham siiñ

tumhārī tarah milnā chhoḌ kar bedard ho rahnā

kaho kyūñ-kar ye saktā hai jite jiyo ye gunah ham siiñ

lage haiñ ġhair-farzīñ kī tarah mil kaj-ravī karne

hamesha jo ki khā jaate haiñ sab bātoñ meñ shah ham siiñ

maiñ apnī jaan siiñ hāzir huuñ lekin 'ābrū' to rakh

ḳhudā ke vāste iitā bhī rūkhā tū na rah ham siiñ

kaho tum kis sabab ruThe ho pyare be-gunah hum sin

churane kyun lagi hain yun teri ankhiyan nigah hum sin

iti na-mehrbani kyun kari nahaq gharibon par

kiya kya hum nin zalim apne ji ki baat kah hum sin

kya tha naqd-e-jaan apna nisar is waste tum par

ki be-taqsir yun dil mein rakhoge tum girah hum sin

taghaful chhuDna zalim be-takalluf ho sitam mat kar

kapaT ki aashnai ye nahin sakti nibah hum sin

tumhaari tarah milna chhoD kar bedard ho rahna

kaho kyun-kar ye sakta hai jite jiyo ye gunah hum sin

lage hain ghair-farzin ki tarah mil kaj-rawi karne

hamesha jo ki kha jate hain sab baaton mein shah hum sin

main apni jaan sin hazir hun lekin 'abru' to rakh

KHuda ke waste ita bhi rukha tu na rah hum sin