kaif-e-junun sahi yahi haalat bani rahe

kaif-e-junūñ sahī yahī hālat banī rahe

lillāh merī un kī mohabbat banī rahe

jo ho gayā so ho gayā ab us ko chhoḌiye

yuuñ kījiye ki ishq kī azmat banī rahe

mere gunah hazār sahī sau kī ek baat

ye hai ki dil meñ aap kī rahmat banī rahe

ai dost tere milne kī sūrat nahīñ sahī

kuchh tere kaam aane kī tāqat banī rahe

dīdār ke ḳhayāl kī jur.at nahīñ mujhe

dar ko salām karne kī aadat banī rahe

ai ishq tū ne ḳhuub kiyā baaġh baaġh dil

tā-umr in guloñ kī ye nik.hat banī rahe

vo aa ga.e haiñ ḳhud hī mirī zindagī meñ ab

āñkhoñ meñ is yaqīn kī jalvat banī rahe

har sū ayaañ bahisht har ik gaam par iram

har lamha vasl hai ye aqīdat banī rahe

yā-rab maiñ kar gayā huuñ kuchh aisī hī ik ḳhatā

yuuñ kījiyo ki dahr meñ izzat banī rahe

'rahbar' ham un se kahte haiñ ham par jafā kareñ

un ko duā.eñ dene kī aadat banī rahe

kaif-e-junun sahi yahi haalat bani rahe

lillah meri un ki mohabbat bani rahe

jo ho gaya so ho gaya ab us ko chhoDiye

yun kijiye ki ishq ki azmat bani rahe

mere gunah hazar sahi sau ki ek baat

ye hai ki dil mein aap ki rahmat bani rahe

ai dost tere milne ki surat nahin sahi

kuchh tere kaam aane ki taqat bani rahe

didar ke KHayal ki jurat nahin mujhe

dar ko salam karne ki aadat bani rahe

ai ishq tu ne KHub kiya bagh bagh dil

ta-umr in gulon ki ye nikhat bani rahe

wo aa gae hain KHud hi meri zindagi mein ab

aankhon mein is yaqin ki jalwat bani rahe

har su ayan bahisht har ek gam par iram

har lamha wasl hai ye aqidat bani rahe

ya-rab main kar gaya hun kuchh aisi hi ek KHata

yun kijiyo ki dahr mein izzat bani rahe

'rahbar' hum un se kahte hain hum par jafa karen

un ko duaen dene ki aadat bani rahe