kaisa kaisa dar pas-e-diwar karna paD gaya

kaisā kaisā dar pas-e-dīvār karnā paḌ gayā

ghar ke andar aur ghar tayyār karnā paḌ gayā

us kināre ne kahā kyā kyā kahūñ kyā baat thī

baat aisī thī ki dariyā paar karnā paḌ gayā

phir bisāt-e-ḳhvāb uThā.ī aur ojhal ho ga.e

shaam kā manzar hameñ hamvār karnā paḌ gayā

ik zarā sā rāsta māñgā thā vīrānī ne kyā

apnā saarā ghar hameñ mismār karnā paḌ gayā

vo kahānī vaqt kā jis meñ tasavvur hī nahīñ

us kahānī meñ hameñ kirdār karnā paḌ gayā

sarsarī samjhā tirī āñkhoñ ko ham ne aur phir

sarsarī chīzoñ pe bhī isrār karnā paḌ gayā

āḳhirash sab ḳhvāb us manzil pe pahuñche haiñ jahāñ

apnī āñkhoñ kā hameñ inkār karnā paḌ gayā

kaisa kaisa dar pas-e-diwar karna paD gaya

ghar ke andar aur ghar tayyar karna paD gaya

us kinare ne kaha kya kya kahun kya baat thi

baat aisi thi ki dariya par karna paD gaya

phir bisat-e-KHwab uThai aur ojhal ho gae

sham ka manzar hamein hamwar karna paD gaya

ek zara sa rasta manga tha virani ne kya

apna sara ghar hamein mismar karna paD gaya

wo kahani waqt ka jis mein tasawwur hi nahin

us kahani mein hamein kirdar karna paD gaya

sarsari samjha teri aankhon ko hum ne aur phir

sarsari chizon pe bhi israr karna paD gaya

aaKHirash sab KHwab us manzil pe pahunche hain jahan

apni aankhon ka hamein inkar karna paD gaya