kaise rafu hon chaak-e-gareban main bhi sochun tu bhi soch

kaise rafū hoñ chāk-e-garebāñ maiñ bhī sochūñ tū bhī soch

apne apne dard kā darmāñ maiñ bhī sochūñ tū bhī soch

jis ke liye ik umr se lambī kaaTī ham ne kaalī raat

sub.h vo kyuuñ hai shām-ba-dāmāñ maiñ bhī sochūñ tū bhī soch

mere lahū se naqsh huī hai merī hī tasvīr magar

kis kā hai ye shauq-e-nigārāñ maiñ bhī sochūñ tū bhī soch

roz-afzūñ hai merī tamannā aur tirā begāna-pan

is be-rabt sī nazm kā unvāñ maiñ bhī sochūñ tū bhī soch

zaḳhmoñ ke ḳhūñ-rañg ujāle mujh ko hī marġhūb sahī

kaun hai in zaḳhmoñ meñ farozāñ maiñ bhī sochūñ tū bhī soch

ghar kī muñDeroñ tak barpā hai dīvālī kā saarā jashn

kaise ho andar bhī charāġhāñ maiñ bhī sochūñ tū bhī soch

dil ne bhī thak-hār ke āḳhir dar-darvāze band kiye

kaun ho ab is ġham kā nigahbāñ maiñ bhī sochūñ tū bhī soch

un ke aage phailā huā thā dast-e-tamannā ai 'asrār'

yā ki tah-e-ḳhanjar thī rag-e-jāñ maiñ bhī sochūñ tū bhī soch

kaise rafu hon chaak-e-gareban main bhi sochun tu bhi soch

apne apne dard ka darman main bhi sochun tu bhi soch

jis ke liye ek umr se lambi kaTi hum ne kali raat

subh wo kyun hai sham-ba-daman main bhi sochun tu bhi soch

mere lahu se naqsh hui hai meri hi taswir magar

kis ka hai ye shauq-e-nigaran main bhi sochun tu bhi soch

roz-afzun hai meri tamanna aur tera begana-pan

is be-rabt si nazm ka unwan main bhi sochun tu bhi soch

zaKHmon ke KHun-rang ujale mujh ko hi marghub sahi

kaun hai in zaKHmon mein farozan main bhi sochun tu bhi soch

ghar ki munDeron tak barpa hai diwali ka sara jashn

kaise ho andar bhi charaghan main bhi sochun tu bhi soch

dil ne bhi thak-haar ke aaKHir dar-darwaze band kiye

kaun ho ab is gham ka nigahban main bhi sochun tu bhi soch

un ke aage phaila hua tha dast-e-tamanna ai 'asrar'

ya ki tah-e-KHanjar thi rag-e-jaan main bhi sochun tu bhi soch