kaisi uljhan hai sochta kya hai

kaisī uljhan hai sochtā kyā hai

saaf kah de ki mudda'ā kyā hai

hasrateñ yaas zaḳhm mahrūmī

aur is dil meñ ab bachā kyā hai

har-ghaḌī be-kalī-o-be-zārī

ai mire dil tujhe huā kyā hai

chāhtī kyā hai kuchh to vāzeh ho

zindagī terā mudda'ā kyā hai

dil karūñ nazr yā ki jaan nisār

bol ai dost chāhtā kyā hai

qatl-o-ḳhūñ ranjisheñ fareb daġhā

aah ab is ke mā-sivā kyā hai

kyā batā.eñge aglī nasl ko ham

pyaar kyā chiiz hai vafā kyā hai

vo tabāhī pe merī hañs ke 'salīm'

bas yahī kah sake huā kyā hai

kaisi uljhan hai sochta kya hai

saf kah de ki mudda'a kya hai

hasraten yas zaKHm mahrumi

aur is dil mein ab bacha kya hai

har-ghaDi be-kali-o-be-zari

ai mere dil tujhe hua kya hai

chahti kya hai kuchh to wazeh ho

zindagi tera mudda'a kya hai

dil karun nazr ya ki jaan nisar

bol ai dost chahta kya hai

qatl-o-KHun ranjishen fareb dagha

aah ab is ke ma-siwa kya hai

kya bataenge agli nasl ko hum

pyar kya chiz hai wafa kya hai

wo tabahi pe meri hans ke 'salim'

bas yahi kah sake hua kya hai