kal tak uski wo mehrbani thi

kal tak us kī vo mehrbānī thī

aaj dekhā to sargirānī thī

kiyā ġhamgīn us ne ham ko nit

jis ke milne kī shādmānī thī

go ba-zāhir vo ġhair se thā do-chār

ham se bhī dostī nibhānī thī

jal-bujhe tab khulā patañgoñ par

sham.a aur dostī zabānī thī

aa gayā rahm us ke dil meñ aah

ham ne yuuñ apnī marg Thānī thī

so gayā sunte hī vo ġham kī mire

sarguzisht us ke ta.iiñ kahānī thī

na 'jahāñdār' jaane thā ai 'mīr'

dostī mudda.ī-e-jānī thī

kal tak us ki wo mehrbani thi

aaj dekha to sargirani thi

kiya ghamgin us ne hum ko nit

jis ke milne ki shadmani thi

go ba-zahir wo ghair se tha do-chaar

hum se bhi dosti nibhani thi

jal-bujhe tab khula patangon par

shama aur dosti zabani thi

aa gaya rahm us ke dil mein aah

hum ne yun apni marg Thani thi

so gaya sunte hi wo gham ki mere

sarguzisht us ke tain kahani thi

na 'jahandar' jaane tha ai 'mir'

dosti muddai-e-jaani thi