kalam-e-saKHt kah kah kar wo kya hum par baraste hain

kalām-e-saḳht kah kah kar vo kyā ham par baraste haiñ

lab un ke la.al haiñ par la.al se patthar baraste haiñ

banā gar qatra vaañ gauhar to yaañ gauhar baraste haiñ

hamāre dīda-e-tar abr se behtar baraste haiñ

araq ruḳh kā naqāb-e-ruḳh se jab Tapkā to ham samjhe

ki mah par chhā rahā hai abr aur aḳhtar baraste haiñ

jhapaknā jis ne dekhā ho tirī palkoñ kā vo jaane

vagarna kaun maane gar kahūñ ḳhanjar baraste haiñ

tamāshā dekh sailāb-e-bahārī par habāboñ kā

uThā lā shīsha saaqī abr se sāġhar baraste haiñ

tire dar par gadā-o-shah ke ġhash khā khā ke girne se

dil-o-jāñ bahte phirte haiñ sar-o-afsar baraste haiñ

sarishk-e-chashm se naale ravāñ hote nahīñ dekhe

kahe kaun is ko ronā dīda-hā-e-tar baraste haiñ

jalā ḳhirman to kyā par jo dhueñ uThte haiñ ḳhirman se

sitam hai ban ke bādal kisht-e-dushman par baraste haiñ

mirī hastī magar fasl-e-bahār-e-sho.ala hai 'nāzim'

sharar phalte haiñ daaġh ugte haiñ aur aḳhgar baraste haiñ

kalam-e-saKHt kah kah kar wo kya hum par baraste hain

lab un ke lal hain par lal se patthar baraste hain

bana gar qatra wan gauhar to yan gauhar baraste hain

hamare dida-e-tar abr se behtar baraste hain

araq ruKH ka naqab-e-ruKH se jab Tapka to hum samjhe

ki mah par chha raha hai abr aur aKHtar baraste hain

jhapakna jis ne dekha ho teri palkon ka wo jaane

wagarna kaun mane gar kahun KHanjar baraste hain

tamasha dekh sailab-e-bahaari par hababon ka

uTha la shisha saqi abr se saghar baraste hain

tere dar par gada-o-shah ke ghash kha kha ke girne se

dil-o-jaan bahte phirte hain sar-o-afsar baraste hain

sarishk-e-chashm se nale rawan hote nahin dekhe

kahe kaun is ko rona dida-ha-e-tar baraste hain

jala KHirman to kya par jo dhuen uThte hain KHirman se

sitam hai ban ke baadal kisht-e-dushman par baraste hain

meri hasti magar fasl-e-bahaar-e-shoala hai 'nazim'

sharar phalte hain dagh ugte hain aur aKHgar baraste hain