kaman hua hai qad abru ke gosha-ghiron ka

kamāñ huā hai qad abrū ke gosha-gīroñ kā

tabāhe haal tirī zulf ke asīroñ kā

Dhale hai jis pe dil tis kā kiyā hai zāhir ism

vahī hai vo ki jo marja.a hai in zamīroñ kā

har ek sabz hai hindostān kā ma.ashūq

bajā hai naam ki bālam rakhā hai khīroñ kā

murīd piiT ke kyuuñ na.ara-zan na hoñ un kā

burā hai haal ki laagā hai zaḳhm pīroñ kā

birah kī raah meñ jo kui girā so phir na uThā

qadam phirā nahīñ yaañ aa ke dast-gīroñ kā

vo aur shakl hai kartī hai dil ko jo tasḳhīr

abas hai shaiḳh tirā naqsh ye lakīroñ kā

sailī meñ juuñ ki laTakkā ho 'ābrū' yuuñ dil

sajan kī zulf meñ laTkā liyā faqīroñ kā

kaman hua hai qad abru ke gosha-giron ka

tabahe haal teri zulf ke asiron ka

Dhale hai jis pe dil tis ka kiya hai zahir ism

wahi hai wo ki jo marja hai in zamiron ka

har ek sabz hai hindostan ka mashuq

baja hai nam ki baalam rakha hai khiron ka

murid piT ke kyun nara-zan na hon un ka

bura hai haal ki laga hai zaKHm piron ka

birah ki rah mein jo kui gira so phir na uTha

qadam phira nahin yan aa ke dast-giron ka

wo aur shakl hai karti hai dil ko jo tasKHir

abas hai shaiKH tera naqsh ye lakiron ka

saili mein jun ki laTakka ho 'abru' yun dil

sajan ki zulf mein laTka liya faqiron ka