kamtar nahin hai zahr se yaksaniyat mujhe

kamtar nahīñ hai zahr se yaksāniyat mujhe

tanhā.ī ne Dasā hai to aa.ī hai mat mujhe

maiñ dhuup ke safar meñ na Thahrā na dam liyā

raste meñ yuuñ to peḌ mile an-ginat mujhe

bārish meñ le ke jā.ūñ kahāñ ḳhasta jism ko

ghar se na yuuñ nikāl mire ghar kī chhat mujhe

lāzim nahīñ ki naam kī taḳhtī lagā.ī jaa.e

sab log jānte haiñ tirī mā'rifat mujhe

kaalī davāt kaun uñDele fasīl par

manzūr hī nahīñ hai lahū kī bachat mujhe

mailā libās jitnā hai lafz utne ḳhush-numā

jazboñ kī āgahī hai ye achchhī bunat mujhe

P.R.Ship ke tābe'-e-farmāñ hai shā'irī

mulk-e-suḳhan kī kaise mile saltanat mujhe

kāfir thā kis qadar mire andar kā aadmī

likh kar sunā gayā jo mirī manqabat mujhe

'be-dil' na toffiyāñ na khilaune the haath meñ

bachche se shaam karnī paḌī mā'zarat mujhe

kamtar nahin hai zahr se yaksaniyat mujhe

tanhai ne Dasa hai to aai hai mat mujhe

main dhup ke safar mein na Thahra na dam liya

raste mein yun to peD mile an-ginat mujhe

barish mein le ke jaun kahan KHasta jism ko

ghar se na yun nikal mere ghar ki chhat mujhe

lazim nahin ki nam ki taKHti lagai jae

sab log jaante hain teri ma'rifat mujhe

kali dawat kaun unDele fasil par

manzur hi nahin hai lahu ki bachat mujhe

maila libas jitna hai lafz utne KHush-numa

jazbon ki aagahi hai ye achchhi bunat mujhe

PRShip ke tabe'-e-farman hai sha'iri

mulk-e-suKHan ki kaise mile saltanat mujhe

kafir tha kis qadar mere andar ka aadmi

likh kar suna gaya jo meri manqabat mujhe

'be-dil' na toffiyan na khilaune the hath mein

bachche se sham karni paDi ma'zarat mujhe