kaTta hai waqt kaise bata dun janab ka

kaTtā hai vaqt kaise batā duuñ janāb kā

qissa sunāyā karte haiñ ahd-e-shabāb kā

ai maulā tū rahīm hai ye jāntā huuñ maiñ

rakkhā hai yuuñ hī pech hisāb-o-kitāb kā

tum aa ga.e ḳhushī milī aañsū Thahar ga.e

guzrā kaThin zamāna mire iztirāb kā

tāroñ ke darmiyān hai jo imtiyāz-e-chāñd

darja hai gulsitāñ meñ vahī to gulāb kā

malmal kā isti.māl bajā hai magar ye kyā

charchā hai anjuman meñ abhī tak naqāb kā

itnī ḳhatā thī 'nazr' tumhīñ sar-nigūñ na the

Dolā guzar rahā thā jo izzat-ma.āb kā

kaTta hai waqt kaise bata dun janab ka

qissa sunaya karte hain ahd-e-shabab ka

ai maula tu rahim hai ye jaanta hun main

rakkha hai yun hi pech hisab-o-kitab ka

tum aa gae KHushi mili aansu Thahar gae

guzra kaThin zamana mere iztirab ka

taron ke darmiyan hai jo imtiyaz-e-chand

darja hai gulsitan mein wahi to gulab ka

malmal ka istimal baja hai magar ye kya

charcha hai anjuman mein abhi tak naqab ka

itni KHata thi 'nazr' tumhin sar-nigun na the

Dola guzar raha tha jo izzat-maab ka