kaun jaane hai ba-juz sail-e-bala ghar mera

kaun jaane hai ba-juz sail-e-balā ghar merā

kis se pūchhoge pata shahr ke andar merā

fikr kī sham'-e-farozāñ hai añdhere meñ abhī

dosh par mere salāmat hai abhī sar merā

hādse chain se jiine bhī nahīñ dete mujhe

mujh meñ marne bhī nahīñ dete suḳhan-var merā

kitne TuuTe hue kāñToñ se lahū-rang huuñ maiñ

dekho ā.īna-e-ash'ār meñ paikar merā

hone ko arz-o-samā zer-e-nagīñ haiñ mere

kahne ko dasht hai merā na samundar merā

maiñ ne ik baar uchhālā thā havā meñ patthar

mujh pe sau martaba pheñkā gayā patthar merā

merī uftād tabī'at to hai qātil 'nazmī'

zinda rakhne ke liye hai mujhe jauhar merā

kaun jaane hai ba-juz sail-e-bala ghar mera

kis se puchhoge pata shahr ke andar mera

fikr ki sham'-e-farozan hai andhere mein abhi

dosh par mere salamat hai abhi sar mera

hadse chain se jine bhi nahin dete mujhe

mujh mein marne bhi nahin dete suKHan-war mera

kitne TuTe hue kanTon se lahu-rang hun main

dekho aaina-e-ash'ar mein paikar mera

hone ko arz-o-sama zer-e-nagin hain mere

kahne ko dasht hai mera na samundar mera

main ne ek bar uchhaala tha hawa mein patthar

mujh pe sau martaba phenka gaya patthar mera

meri uftad tabi'at to hai qatil 'nazmi'

zinda rakhne ke liye hai mujhe jauhar mera