kaun qatil hai mera nam nahin de sakta

kaun qātil hai mirā naam nahīñ de saktā

maiñ use 'ishrat-e-anjām nahīñ de saktā

shauq se vaar karo par ye batā duuñ tum ko

merā marnā tumheñ ārām nahīñ de saktā

qīmtī baat hai maiñ ġhaur karūñgā lekin

maiñ use darja-e-ilhām nahīñ de saktā

khiḌkiyoñ se tirī ḳhvāhish ke khilaune aksar

jī lubhāte haiñ magar daam nahīñ de saktā

maiñ tirī baat pe ḳhush huuñ yā ḳhafā huuñ kyā huuñ

apne jazbāt ko kuchh naam nahīñ de saktā

aaj paiġhām na bhejo mujhe daftar vaalo

maiñ tumheñ aisī hasīñ shaam nahīñ de saktā

jis ko pahchān nahīñ mere hunar kī 'sayyad'

aisā nākām mujhe kaam nahīñ de saktā

kaun qatil hai mera nam nahin de sakta

main use 'ishrat-e-anjam nahin de sakta

shauq se war karo par ye bata dun tum ko

mera marna tumhein aaram nahin de sakta

qimti baat hai main ghaur karunga lekin

main use darja-e-ilham nahin de sakta

khiDkiyon se teri KHwahish ke khilaune aksar

ji lubhate hain magar dam nahin de sakta

main teri baat pe KHush hun ya KHafa hun kya hun

apne jazbaat ko kuchh nam nahin de sakta

aaj paigham na bhejo mujhe daftar walo

main tumhein aisi hasin sham nahin de sakta

jis ko pahchan nahin mere hunar ki 'sayyad'

aisa nakaam mujhe kaam nahin de sakta