KHandgi KHush lab tabassum misl-e-arman ho gae

ḳhandgī ḳhush lab tabassum misl-e-armāñ ho ga.e

ahd-e-be-ġham juuñ hī aayā ham pareshāñ ho ga.e

aage thī ham ko qarābat shab se shab ko ham se thī

un ko thī ḳhalvat se raġhbat ham shabistāñ ho ga.e

haa.e ye ijz-o-niyāz-e-mai-kashāñ bhī kam nahīñ

aah kyā bhar lī ki ham ḳhāk-e-gulistāñ ho ga.e

kyā tirī mahfil kī hai ye irtijālī ai ḳhudā

saañs kī fursat na dī aur ahd-o-paimāñ ho ga.e

kyā kareñ shikva tirī be-e.atidālī se raqīb

vo bulā.e bhī na aa.e aap mehmān ho ga.e

yaad hai ham ko junūn-e-lā-fanā kī laġhzisheñ

ham meñ thī maujeñ kabhī ab dasht-e-vīrāñ ho ga.e

rakh liyā saaqī ne merī ḳhastagī kā ye bharam

shaiḳh kī majlis meñ ham pastī kā sāmāñ ho ga.e

tere kākul kī darāzī ho ki zulfoñ kā sitam

ham ne āñkheñ un se mūñdīñ bhī to zindāñ ho ga.e

terī qāmat par fidā ho kyā ki lab par iftiḳhār

terī añgusht-e-hinā.ī par hī qurbāñ ho ga.e

aah vo bāliġh tirā mash.hūr fahvā-e-kalām

bulbuloñ ne ham ko dekhā kal to hairāñ ho ga.e

KHandgi KHush lab tabassum misl-e-arman ho gae

ahd-e-be-gham jun hi aaya hum pareshan ho gae

aage thi hum ko qarabat shab se shab ko hum se thi

un ko thi KHalwat se raghbat hum shabistan ho gae

hae ye ijz-o-niyaz-e-mai-kashan bhi kam nahin

aah kya bhar li ki hum KHak-e-gulistan ho gae

kya teri mahfil ki hai ye irtijali ai KHuda

sans ki fursat na di aur ahd-o-paiman ho gae

kya karen shikwa teri be-eatidali se raqib

wo bulae bhi na aae aap mehman ho gae

yaad hai hum ko junun-e-la-fana ki laghzishen

hum mein thi maujen kabhi ab dasht-e-viran ho gae

rakh liya saqi ne meri KHastagi ka ye bharam

shaiKH ki majlis mein hum pasti ka saman ho gae

tere kakul ki daraazi ho ki zulfon ka sitam

hum ne aankhen un se mundin bhi to zindan ho gae

teri qamat par fida ho kya ki lab par iftiKHar

teri angusht-e-hinai par hi qurban ho gae

aah wo baaligh tera mashhur fahwa-e-kalam

bulbulon ne hum ko dekha kal to hairan ho gae