khaTakte hain nigah-e-baghban mein

khaTakte haiñ nigāh-e-bāġhbāñ meñ

jo haiñ do-chār tinke āshiyāñ meñ

har ik saḳhtī meñ aalam naza.a kā thā

hamārī umr guzrī imtihāñ meñ

chhuḌā le sajda karne meñ na koī

lage haiñ laal sañg-e-āstāñ meñ

sharāre haiñ mire nāloñ ke qaa.em

ki taare jaḌ diye haiñ āsmāñ meñ

qarīb ab fasl-e-gul shāyad hai sayyād

mazā aane lagā merī fuġhāñ meñ

taras aatā nahīñ mujh par kisī ko

maiñ fariyād-e-jaras huuñ kārvāñ meñ

asar mai kā hai yā tauba kā nāseh

ki talḳhī sī hai kuchh ab tak zabāñ meñ

taḌapne vāloñ meñ bhī tafarqe hai

qafas meñ ham haiñ bijlī āshiyāñ meñ

kisī se chhūT kar aalam hai kuchh aur

paḌā hai tafarqe sā jism-o-jāñ meñ

'riyāz' ustād ne rutba ye baḳhshā

hamārī dhuum hai hindostāñ meñ

khaTakte hain nigah-e-baghban mein

jo hain do-chaar tinke aashiyan mein

har ek saKHti mein aalam naza ka tha

hamari umr guzri imtihan mein

chhuDa le sajda karne mein na koi

lage hain lal sang-e-astan mein

sharare hain mere nalon ke qaem

ki tare jaD diye hain aasman mein

qarib ab fasl-e-gul shayad hai sayyaad

maza aane laga meri fughan mein

taras aata nahin mujh par kisi ko

main fariyaad-e-jaras hun karwan mein

asar mai ka hai ya tauba ka naseh

ki talKHi si hai kuchh ab tak zaban mein

taDapne walon mein bhi tafarqe hai

qafas mein hum hain bijli aashiyan mein

kisi se chhuT kar aalam hai kuchh aur

paDa hai tafarqe sa jism-o-jaan mein

'riyaz' ustad ne rutba ye baKHsha

hamari dhum hai hindostan mein