KHayal-e-hijr mein ab jo bhi saneha hoga

ḳhayāl-e-hijr meñ ab jo bhī sāneha hogā

vahī to phir se nayā ek silsila hogā

kise ḳhabar thī ki is raushnī kī chādar meñ

hamārā ishq meñ phūloñ se rābta hogā

amīr-e-shahr ko paiġhām mil bhī jaa.e to

ġharīb-e-shahr kā koī na aasrā hogā

na.e ufuq se gurezāñ na ho mire hamdam

purānī soch se ab ye na faisla hogā

ḳhudā kā shukr duā.eñ jo rañg laa.ī haiñ

likhūñgī lafz maiñ jo bhī vo barmalā hogā

suneñge log ye jab bhī mirī kahānī ko

hisār-e-zāt ke qaidī kā mājrā hogā

ajiib haal hai andar kī ḳhalfashārī kā

kise ḳhabar thī ki aisā ye hādisa hogā

KHayal-e-hijr mein ab jo bhi saneha hoga

wahi to phir se naya ek silsila hoga

kise KHabar thi ki is raushni ki chadar mein

hamara ishq mein phulon se rabta hoga

amir-e-shahr ko paigham mil bhi jae to

gharib-e-shahr ka koi na aasra hoga

nae ufuq se gurezan na ho mere hamdam

purani soch se ab ye na faisla hoga

KHuda ka shukr duaen jo rang lai hain

likhungi lafz main jo bhi wo barmala hoga

sunenge log ye jab bhi meri kahani ko

hisar-e-zat ke qaidi ka majra hoga

ajib haal hai andar ki KHalfashaari ka

kise KHabar thi ki aisa ye hadisa hoga