KHilaf-e-rasm-e-taghazzul ghazal-sara hun main

ḳhilāf-e-rasm-e-taġhazzul ġhazal-sarā huuñ maiñ

rubāb-e-vaqt kī bigḌī huī sadā huuñ maiñ

fazā.eñ deñ na jagah merī be-qarārī ko

havā.eñ mujh ko sulā deñ ki jāgtā huuñ maiñ

jaras huuñ maiñ mirā naala mirī tabī.at hai

ye kyuuñ kahūñ ki kisī ko pukārtā huuñ maiñ

girā to huuñ magar ai chashm-e-e'tibār ye dekh

ki kis bulandi-e-me.ār se girā huuñ maiñ

mirī fuġhāñ se shikāyat hai sone vāloñ ko

mirā gunāh yahī hai ki jāgtā huuñ maiñ

'jamīl' ḳhunki-e-marham kā maiñ nahīñ qaa.el

jarāhatoñ ko namak-dāñ dikhā rahā huuñ maiñ

KHilaf-e-rasm-e-taghazzul ghazal-sara hun main

rubab-e-waqt ki bigDi hui sada hun main

fazaen den na jagah meri be-qarari ko

hawaen mujh ko sula den ki jagta hun main

jaras hun main mera nala meri tabiat hai

ye kyun kahun ki kisi ko pukarta hun main

gira to hun magar ai chashm-e-e'tibar ye dekh

ki kis bulandi-e-mear se gira hun main

meri fughan se shikayat hai sone walon ko

mera gunah yahi hai ki jagta hun main

'jamil' KHunki-e-marham ka main nahin qael

jarahaton ko namak-dan dikha raha hun main