خرد جنوں کو اگر بھا گیا تو کیا ہوگا

خرد جنوں کو اگر بھا گیا تو کیا ہوگا

فقیر رقص سے گھبرا گیا تو کیا ہوگا

تمام وقت گزرتا ہے اپنے ساتھ ترا

تو اپنے آپ سے اکتا گیا تو کیا ہوگا

امور دہر میں اس وقت ہوں بہت مصروف

ترا خیال مجھے آ گیا تو کیا ہوگا

ابھی تو روکے ہوئے ہے کہیں کہیں سورج

یہ ابر پوری طرح چھا گیا تو کیا ہوگا

سجی ہوئی ہے تری یاد میرے کمرے میں

اگر یہاں تو کبھی آ گیا تو کیا ہوگا

سوائے جنگ کے صورت نہیں رہی کوئی

انہیں خطوط پہ سوچا گیا تو کیا ہوگا