KHizan se sina bhara ho lekin tum apna chehra gulab rakhna

ḳhizāñ se siina bharā ho lekin tum apnā chehra gulāb rakhnā

tamām ta.abīr us ko denā aur apne hisse meñ ḳhvāb rakhnā

har ik zamīñ se har āsmāñ se har ik zamāñ se guzarte rahnā

kahīñ pe taare bikher denā kahīñ koī māhtāb rakhnā

jo be-gharī ke dukhoñ se tum bhī udaas ho jaao haar jaao

to āñsuoñ se makāñ banānā aur us ke uupar sahāb rakhnā

jo an-kahe haiñ jo an-sune haiñ vo saare manzar bhī dekh loge

bas apnī āñkhoñ kī chup meñ raushan mohabbatoñ ke azaab rakhnā

muhīb rātoñ ke jañgaloñ meñ abad ke jaisā sukūt ho jab

lahū kā apne diyā jalānā aur apnā chehra kitāb rakhnā

tum apne andar kī hijratoñ se niDhāl ho kar jo lauTnā to

na ḳhud se koī savāl karnā na paas apne javāb rakhnā

ye zindagī to safar hai 'sābir' safar meñ jab bhī kisī se milnā

tamām sadme bhulāte rahnā muhāl hogā hisāb rakhnā

KHizan se sina bhara ho lekin tum apna chehra gulab rakhna

tamam tabir us ko dena aur apne hisse mein KHwab rakhna

har ek zamin se har aasman se har ek zaman se guzarte rahna

kahin pe tare bikher dena kahin koi mahtab rakhna

jo be-ghari ke dukhon se tum bhi udas ho jao haar jao

to aansuon se makan banana aur us ke upar sahab rakhna

jo an-kahe hain jo an-sune hain wo sare manzar bhi dekh loge

bas apni aankhon ki chup mein raushan mohabbaton ke azab rakhna

muhib raaton ke jangalon mein abad ke jaisa sukut ho jab

lahu ka apne diya jalana aur apna chehra kitab rakhna

tum apne andar ki hijraton se niDhaal ho kar jo lauTna to

na KHud se koi sawal karna na pas apne jawab rakhna

ye zindagi to safar hai 'sabir' safar mein jab bhi kisi se milna

tamam sadme bhulate rahna muhaal hoga hisab rakhna