KHud apne aap se ye gila umr bhar kiya

ḳhud apne aap se ye gila umr bhar kiyā

kaise tire firāq kā mausam basar kiyā

minqār se havā ne likhī dāstān-e-hijr

yuuñ harf-e-mo'tabar ko bhī nā-mo'tabar kiyā

kaisī havā chalī ki ma.an bārishoñ ke ba.ad

har be-gulāb rut ne gulistāñ meñ ghar kiyā

ḳhud ham ne kaaT kaaT dī zanjīr saañs kī

ḳhud ham ne zindagī kā safar muḳhtasar kiyā

be-āb ā.inoñ ko bhī ik aab baḳhsh dī

har chand be-hunar the ye kār-e-hunar kiyā

saare sutūn ret kī buniyād par uThā.e

ham ne kis ehtiyāt se ta.amīr ghar kiyā

duniyā simaT ke ek hī nukte meñ aa ga.ī

ham ne jab apnī zaat ke andar safar kiyā

thā miir jī ko izzat-e-sādāt kā ḳhayāl

ham ne suḳhan ko jins-e-dukān-e-hunar kiyā

mauqa.a-shanās qasr-e-havas meñ pahuñch ga.e

tai marhala uḌaan kā be-bāl-o-par kiyā

ḳhushbū mire badan se ḳhud aa kar lipaT ga.ī

'mohsin' ye kis dayār se maiñ ne guzar kiyā

KHud apne aap se ye gila umr bhar kiya

kaise tere firaq ka mausam basar kiya

minqar se hawa ne likhi dastan-e-hijr

yun harf-e-mo'tabar ko bhi na-mo'tabar kiya

kaisi hawa chali ki man barishon ke baad

har be-gulab rut ne gulistan mein ghar kiya

KHud hum ne kaT kaT di zanjir sans ki

KHud hum ne zindagi ka safar muKHtasar kiya

be-ab aainon ko bhi ek aab baKHsh di

har chand be-hunar the ye kar-e-hunar kiya

sare sutun ret ki buniyaad par uThae

hum ne kis ehtiyat se tamir ghar kiya

duniya simaT ke ek hi nukte mein aa gai

hum ne jab apni zat ke andar safar kiya

tha mir ji ko izzat-e-sadat ka KHayal

hum ne suKHan ko jins-e-dukan-e-hunar kiya

mauqa-shanas qasr-e-hawas mein pahunch gae

tai marhala uDan ka be-baal-o-par kiya

KHushbu mere badan se KHud aa kar lipaT gai

'mohsin' ye kis dayar se main ne guzar kiya