KHud mein hi Dubti ubharti hun

ḳhud meñ hī Dūbtī ubhartī huuñ

jaane kis ko talāsh kartī huuñ

dil meñ jiine kī aarzū le kar

maiñ ka.ī baar roz martī huuñ

bhar na jaa.e ye zaḳhm ai dil merā

is liye chheḌ-chhāḌ kartī huuñ

tum yuuñ hī aa.ina bane rahnā

maiñ tumheñ dekh kar sañvartī huuñ

ḳhāmushī mujh ko raas aatī hai

is liye toḌne se Dartī huuñ

bhāgtī huuñ vajūd se apne

aur kabhī ḳhud hī ḳhud pe martī huuñ

kyuuñ yahāñ huuñ kahāñ hai ab jaanā

ḳhud se aksar savāl kartī huuñ

maiñ gurezāñ huuñ ḳhud se kuchh aise

apne saa.e se bhī mukartī huuñ

us kī tasvīr meñ 'suman' aksar

maiñ vafāoñ ke rañg bhartī huuñ

KHud mein hi Dubti ubharti hun

jaane kis ko talash karti hun

dil mein jine ki aarzu le kar

main kai bar roz marti hun

bhar na jae ye zaKHm ai dil mera

is liye chheD-chhaD karti hun

tum yun hi aaina bane rahna

main tumhein dekh kar sanwarti hun

KHamushi mujh ko ras aati hai

is liye toDne se Darti hun

bhagti hun wajud se apne

aur kabhi KHud hi KHud pe marti hun

kyun yahan hun kahan hai ab jaana

KHud se aksar sawal karti hun

main gurezan hun KHud se kuchh aise

apne sae se bhi mukarti hun

us ki taswir mein 'suman' aksar

main wafaon ke rang bharti hun