KHuda asar se bachae is aastane ko

ḳhudā asar se bachā.e is āstāne ko

du'ā chalī hai mirī qismat āzmāne ko

na pūchhiye ki mohabbat meñ mujh pe kyā guzrī

na chheḌiye mire bhūle hue fasāne ko

ye sho'bade ye karishme kise mayassar the

tirī nigāh ne sikhlā diye zamāne ko

chaman meñ barq ne jhāñkā ki ham laraz uTThe

ab is se aag hī lag jaa.e āshiyāne ko

ḳhayāl-e-yār bhī khoyā huā sā rahtā hai

ab un kī yaad bhī aatī hai bhuul jaane ko

nigāh-e-lutf na farmā nigāh-e-nāz ke baa'd

jigar meñ aag lagā kar na aa bujhāne ko

zamāna bar-sar-e-āzār thā magar 'fānī'

taḌap ke ham ne bhī taḌpā diyā zamāne ko

KHuda asar se bachae is aastane ko

du'a chali hai meri qismat aazmane ko

na puchhiye ki mohabbat mein mujh pe kya guzri

na chheDiye mere bhule hue fasane ko

ye sho'bade ye karishme kise mayassar the

teri nigah ne sikhla diye zamane ko

chaman mein barq ne jhanka ki hum laraz uTThe

ab is se aag hi lag jae aashiyane ko

KHayal-e-yar bhi khoya hua sa rahta hai

ab un ki yaad bhi aati hai bhul jaane ko

nigah-e-lutf na farma nigah-e-naz ke ba'd

jigar mein aag laga kar na aa bujhane ko

zamana bar-sar-e-azar tha magar 'fani'

taDap ke hum ne bhi taDpa diya zamane ko