KHuda jaane kahan ye fikr ka rahwar le jae

ḳhudā jaane kahāñ ye fikr kā rahvār le jaa.e

samundar meñ Duubā de yā samundar paar le jaa.e

lagānā ho jise apne safīne ko kināre se

maiñ de dūñgā magar vo maañg kar patvār le jaa.e

maiñ yūsuf to nahīñ lekin zuleḳhā-e-jahāñ sun leñ

na ho jis ko yaqīñ mujh ko sar-e-bāzār le jaa.e

bhikārī ban ke aatā huuñ kabhī ye aap ne sochā

kahāñ tak aap ke dar se koī inkār le jaa.e

vo merī nafratoñ se ḳhatm kar ke vāsta apnā

koī dushman bhī ho merā to mujh se pyaar le jaa.e

ye bāteñ haiñ alag sāñseñ mirī thamne ko haiñ lekin

maiñ jab tak huuñ davā sehat kī har bīmār le jaa.e

yaqīñ hai jiit legā dil vo saare sunñe vāloñ kā

agar mahfil meñ 'ġhaibī' ko koī ik baar le jaa.e

KHuda jaane kahan ye fikr ka rahwar le jae

samundar mein Duba de ya samundar par le jae

lagana ho jise apne safine ko kinare se

main de dunga magar wo mang kar patwar le jae

main yusuf to nahin lekin zuleKHa-e-jahan sun len

na ho jis ko yaqin mujh ko sar-e-bazar le jae

bhikari ban ke aata hun kabhi ye aap ne socha

kahan tak aap ke dar se koi inkar le jae

wo meri nafraton se KHatm kar ke wasta apna

koi dushman bhi ho mera to mujh se pyar le jae

ye baaten hain alag sansen meri thamne ko hain lekin

main jab tak hun dawa sehat ki har bimar le jae

yaqin hai jit lega dil wo sare sunne walon ka

agar mahfil mein 'ghaibi' ko koi ek bar le jae