KHush-fahmi-e-hunar ne sambhalne nahin diya

ḳhush-fahmī-e-hunar ne sambhalne nahīñ diyā

mujh ko mirī anā hī ne phalne nahīñ diyā

chāhā na.e se rītī-rivājoñ meñ maiñ Dhalūñ

lekin rivāyatoñ ne hī Dhalne nahīñ diyā

ek ek shai badaltī ga.ī mere ās-pās

hālāt ne mujhe hī badalne nahīñ diyā

chalnā thā saath saath hameñ umr-bhar magar

nā-pā.edār umr ne chalne nahīñ diyā

dil mai-kade kī samt chalā thā magar use

is rāste pe aql ne chalne nahīñ diyā

anjām aarzū kā burā hai bas is liye

dil meñ kabhī charāġh ye jalne nahīñ diyā

'darvesh' be-qarār rahā dil tamām-umr

mauqa sukūñ kā ek bhī pal ne nahīñ diyā

KHush-fahmi-e-hunar ne sambhalne nahin diya

mujh ko meri ana hi ne phalne nahin diya

chaha nae se riti-riwajon mein main Dhalun

lekin riwayaton ne hi Dhalne nahin diya

ek ek shai badalti gai mere aas-pas

haalat ne mujhe hi badalne nahin diya

chalna tha sath sath hamein umr-bhar magar

na-paedar umr ne chalne nahin diya

dil mai-kade ki samt chala tha magar use

is raste pe aql ne chalne nahin diya

anjam aarzu ka bura hai bas is liye

dil mein kabhi charagh ye jalne nahin diya

'darwesh' be-qarar raha dil tamam-umr

mauqa sukun ka ek bhi pal ne nahin diya