KHush-rang-o-tar-o-taza jawani ki taraf aa

ḳhush-rang-o-tar-o-tāza javānī kī taraf aa

pyāsā hai to bahte hue paanī kī taraf aa

kuchh pal ke liye apne fasāne kā varaq moḌ

fursat se kabhī merī kahānī kī taraf aa

tarsīl nahīñ hotī tirī fikr-e-rasā kī

ai zūd-bayāñ husn-e-ma.ānī kī taraf aa

parvāz kī ḳhvāhish hai to dīvār-e-qafas toḌ

jiinā hai to ab naql-e-makānī kī taraf aa

jauhar to khule tīr-o-sināñ kā tire 'aḳhtar'

laḌnā hai to ham dushman-e-jānī kī taraf aa

KHush-rang-o-tar-o-taza jawani ki taraf aa

pyasa hai to bahte hue pani ki taraf aa

kuchh pal ke liye apne fasane ka waraq moD

fursat se kabhi meri kahani ki taraf aa

tarsil nahin hoti teri fikr-e-rasa ki

ai zud-bayan husn-e-maani ki taraf aa

parwaz ki KHwahish hai to diwar-e-qafas toD

jina hai to ab naql-e-makani ki taraf aa

jauhar to khule tir-o-sinan ka tere 'aKHtar'

laDna hai to hum dushman-e-jaani ki taraf aa