KHushbu-e-dard ke baghair rang-e-jamal ke baghair

ḳhushbū-e-dard ke baġhair rañg-e-jamāl ke baġhair

kaise guzar ga.ī hayāt hijr-o-visāl ke baġhair

in meñ tirā hī rañg hai in meñ tirā hī ruup hai

phūloñ kī kyā misāl duuñ terī misāl ke baġhair

merī talab ko paḌh liyā us kī nigāh-e-tez ne

sau sau haiñ uzr us ke paas mere savāl ke baġhair

tū merā hausla to dekh phir huuñ usī ke rū-ba-rū

tīr-o-tabar haiñ us ke paas aur maiñ Dhaal ke baġhair

baḌh jā tū mujh ko rauñd kar manzil-e-nau kī le ḳhabar

terā uruuj hai muhāl mere zavāl ke baġhair

'pāshī' vo dil kā shahr ho dasht ho yā vo bahr ho

raushan nahīñ koī jagah un ke jamāl ke baġhair

KHushbu-e-dard ke baghair rang-e-jamal ke baghair

kaise guzar gai hayat hijr-o-visal ke baghair

in mein tera hi rang hai in mein tera hi rup hai

phulon ki kya misal dun teri misal ke baghair

meri talab ko paDh liya us ki nigah-e-tez ne

sau sau hain uzr us ke pas mere sawal ke baghair

tu mera hausla to dekh phir hun usi ke ru-ba-ru

tir-o-tabar hain us ke pas aur main Dhaal ke baghair

baDh ja tu mujh ko raund kar manzil-e-nau ki le KHabar

tera uruj hai muhaal mere zawal ke baghair

'pashi' wo dil ka shahr ho dasht ho ya wo bahr ho

raushan nahin koi jagah un ke jamal ke baghair