KHushi ka ek lamha chahiye tha

ḳhushī kā ek lamha chāhiye thā

ghaḌī-bhar saath terā chāhiye thā

milā thā maiñ mahīnoñ baad tum se

tumheñ siine se lagnā chāhiye thā

maiñ duniyā ghūmne bekār niklā

tirī āñkhoñ ko taknā chāhiye thā

hamesha ham ne kī terī tamanna

hameñ kab tere jaisā chāhiye thā

tujhe sauñpā thā apnā aap maiñ ne

to phir mahfūz rakhnā chāhiye thā

use ahvāl batlānā hai apnā

koī zaḳhmī parinda chāhiye thā

tumhāre ishq ne maarā hai jis ko

mujhe vo shaḳhs zinda chāhiye thā

daġhā kar ke bhī kitne mutma.in ho

tumheñ to Duub marnā chāhiye thā

use baḳhshā gayā phir hijr jis ko

javānī meñ buḌhāpā chāhiye thā

sabhī achchhe hoñ kab chāhā thā maiñ ne

mujhe ik dost achchhā chāhiye thā

phañse haiñ ab vahī mushkil Dagar meñ

jinheñ āsān rasta chāhiye thā

koī beva ke dukh ko kyā samajhtā

sabhoñ ko ghar meñ hissa chāhiye thā

maiñ samjhā vo mirī ḳhātir khaḌī hai

magar us ko to rickshaw chāhiye thā

KHushi ka ek lamha chahiye tha

ghaDi-bhar sath tera chahiye tha

mila tha main mahinon baad tum se

tumhein sine se lagna chahiye tha

main duniya ghumne bekar nikla

teri aankhon ko takna chahiye tha

hamesha hum ne ki teri tamanna

hamein kab tere jaisa chahiye tha

tujhe saunpa tha apna aap main ne

to phir mahfuz rakhna chahiye tha

use ahwal batlana hai apna

koi zaKHmi parinda chahiye tha

tumhaare ishq ne mara hai jis ko

mujhe wo shaKHs zinda chahiye tha

dagha kar ke bhi kitne mutmain ho

tumhein to Dub marna chahiye tha

use baKHsha gaya phir hijr jis ko

jawani mein buDhapa chahiye tha

sabhi achchhe hon kab chaha tha main ne

mujhe ek dost achchha chahiye tha

phanse hain ab wahi mushkil Dagar mein

jinhen aasan rasta chahiye tha

koi bewa ke dukh ko kya samajhta

sabhon ko ghar mein hissa chahiye tha

main samjha wo meri KHatir khaDi hai

magar us ko to rickshaw chahiye tha