KHushk aankhon se koi pyas na joDi humne

ḳhushk āñkhoñ se koī pyaas na joḌī ham ne

aas ham se jo sharāboñ ko thī toḌī ham ne

bārhā ham ko milā apne lahū meñ vo sharar

apnī dukhtī huī rag jab bhī nichoḌī ham ne

jo sañvarne ko kisī taur bhī raazī na huī

bhaaḌ meñ pheñk dī duniyā vo nigoḌī ham ne

is tarah ham ne samundar ko pilāyā paanī

apnī kashtī kisī sāhil pe na moḌī ham ne

jab koī chāñd milā daaġh na dekhe us ke

aañkh sūraj se milā kar na sikoḌī ham ne

gard ġhairat ke badan par jo nazar aa.ī kabhī

der tak apnī anā ḳhuub jhinjhoḌī ham ne

KHushk aankhon se koi pyas na joDi hum ne

aas hum se jo sharabon ko thi toDi hum ne

barha hum ko mila apne lahu mein wo sharar

apni dukhti hui rag jab bhi nichoDi hum ne

jo sanwarne ko kisi taur bhi raazi na hui

bhaD mein phenk di duniya wo nigoDi hum ne

is tarah hum ne samundar ko pilaya pani

apni kashti kisi sahil pe na moDi hum ne

jab koi chand mila dagh na dekhe us ke

aankh suraj se mila kar na sikoDi hum ne

gard ghairat ke badan par jo nazar aai kabhi

der tak apni ana KHub jhinjhoDi hum ne