KHushki pe rahungi kabhi pani mein rahungi

ḳhushkī pe rahūñgī kabhī paanī meñ rahūñgī

tā umr isī naql-e-makānī meñ rahūñgī

maiñ jism nahīñ husn huuñ ai chashm-e-abad-tāb

mar kar bhī mohabbat kī kahānī meñ rahūñgī

tābinda raheñge mirī āñkhoñ ke kināre

ashkoñ meñ Dhalī huuñ ki ravānī meñ rahūñgī

ajdād kī qurbat se uThāyā gayā mujh ko

goyā maiñ buzurgoñ kī nishānī meñ rahūñgī

sheroñ hī pe mauqūf nahīñ merī haqīqat

alfāz se bhāgūñgī ma.ānī meñ rahūñgī

ai shā.er-e-dil-soz mire dukh ko bayāñ kar

tā hashr tirī sho.ala-bayānī meñ rahūñgī

ab guḌiyā paToloñ se ilāqa nahīñ 'māhīn'

bachpan se nikal aa.ī javānī meñ rahūñgī

KHushki pe rahungi kabhi pani mein rahungi

ta umr isi naql-e-makani mein rahungi

main jism nahin husn hun ai chashm-e-abad-tab

mar kar bhi mohabbat ki kahani mein rahungi

tabinda rahenge meri aankhon ke kinare

ashkon mein Dhali hun ki rawani mein rahungi

ajdad ki qurbat se uThaya gaya mujh ko

goya main buzurgon ki nishani mein rahungi

sheron hi pe mauquf nahin meri haqiqat

alfaz se bhagungi maani mein rahungi

ai shaer-e-dil-soz mere dukh ko bayan kar

ta hashr teri shoala-bayani mein rahungi

ab guDiya paTolon se ilaqa nahin 'mahin'

bachpan se nikal aai jawani mein rahungi