KHun jab ashk mein Dhalta hai ghazal hoti hai

ḳhuun jab ashk meñ Dhaltā hai ġhazal hotī hai

jab bhī dil rañg badaltā hai ġhazal hotī hai

tere iḳhlās-e-sitam hī kā ise faiz kaheñ

munjamid dard pighaltā hai ġhazal hotī hai

dil ko garmāti hai ashkoñ ke sitāroñ kī kiran

jab diyā shaam kā jaltā hai ġhazal hotī hai

sher hotā hai shafaq meñ jo hinā rachtī hai

laala jab ḳhuun ugaltā hai ġhazal hotī hai

ḳhushk sotoñ ko jagāte haiñ payambar ke qadam

ret se chashma ubaltā hai ġhazal hotī hai

apne siine ke minā meñ bhī tah-e-ḳhanjar-e-ishq

jab koī fidya badaltā hai ġhazal hotī hai

fikr aa jaatī hai tarsīl ke sūraj ke tale

jab koī saaya nikaltā hai ġhazal hotī hai

dāvat-e-pursish-e-ahvāl hai yāroñ se kaho

dariyā jab āñkhoñ kā chaḌhtā hai ġhazal hotī hai

jazba-o-fikr ke ḳhāmosh samundar ke tale

jab bhī tūfān machaltā hai ġhazal hotī hai

mehrbāñ hotā hai jab jaan mohabbat 'tarzī'

dil-e-bīmār sambhaltā hai ġhazal hotī hai

KHun jab ashk mein Dhalta hai ghazal hoti hai

jab bhi dil rang badalta hai ghazal hoti hai

tere iKHlas-e-sitam hi ka ise faiz kahen

munjamid dard pighalta hai ghazal hoti hai

dil ko garmati hai ashkon ke sitaron ki kiran

jab diya sham ka jalta hai ghazal hoti hai

sher hota hai shafaq mein jo hina rachti hai

lala jab KHun ugalta hai ghazal hoti hai

KHushk soton ko jagate hain payambar ke qadam

ret se chashma ubalta hai ghazal hoti hai

apne sine ke mina mein bhi tah-e-KHanjar-e-ishq

jab koi fidya badalta hai ghazal hoti hai

fikr aa jati hai tarsil ke suraj ke tale

jab koi saya nikalta hai ghazal hoti hai

dawat-e-pursish-e-ahwal hai yaron se kaho

dariya jab aankhon ka chaDhta hai ghazal hoti hai

jazba-o-fikr ke KHamosh samundar ke tale

jab bhi tufan machalta hai ghazal hoti hai

mehrban hota hai jab jaan mohabbat 'tarzi'

dil-e-bimar sambhalta hai ghazal hoti hai