KHun patton pe jama ho jaise

ḳhuun pattoñ pe jamā ho jaise

phuul kā rañg harā ho jaise

bārhā ye hameñ mahsūs huā

dard siine kā ḳhudā ho jaise

yuuñ taras khā ke na pūchho ahvāl

tiir siine pe lagā ho jaise

phuul kī aañkh meñ shabnam kyuuñ hai

sab hamārī hī ḳhatā ho jaise

kircheñ chubhtī haiñ bahut siine meñ

aa.ina TuuT gayā ho jaise

sab hameñ dekhne aate haiñ magar

niiñd āñkhoñ se ḳhafā ho jaise

ab charāġhoñ kī zarūrat bhī nahīñ

chāñd is dil meñ chhupā ho jaise

roz aatī thī huā us kī tarah

ab vo aayā to havā ho jaise

KHun patton pe jama ho jaise

phul ka rang hara ho jaise

barha ye hamein mahsus hua

dard sine ka KHuda ho jaise

yun taras kha ke na puchho ahwal

tir sine pe laga ho jaise

phul ki aankh mein shabnam kyun hai

sab hamari hi KHata ho jaise

kirchen chubhti hain bahut sine mein

aaina TuT gaya ho jaise

sab hamein dekhne aate hain magar

nind aankhon se KHafa ho jaise

ab charaghon ki zarurat bhi nahin

chand is dil mein chhupa ho jaise

roz aati thi hua us ki tarah

ab wo aaya to hawa ho jaise