KHwab chahe KHwab hi ho dil lagane de mujhe

ḳhvāb chāhe ḳhvāb hī ho dil lagāne de mujhe

is haqīqat se kabhī to jaañ chhuḌāne de mujhe

inqalāb aa ke rahegā haq kī hogī jiit hī

baiTh mere paas ḳhud ko varġhalāne de mujhe

be-tarah tanhā haiñ vo jo ishq ke qaa.il nahīñ

un ko siine se lagā kuchh pal sulāne de mujhe

āj-kal to ḳhvāb bhī aane lage haiñ aam se

aa bichhaḌ jā ḳhvāb meñ phir ġham purāne de mujhe

roknā hai ḳhud ko har kār-e-junūñ se ab mujhe

yaar ab kuchh dost nāseh kuchh siyāne de mujhe

ghar meñ rah kar bhī tirī sahrā-navardī kam nahīñ

apnī sī dīvāngī ab ai divāne de mujhe

ishq yak-rañgī huā aur ġham bhī kuchh taaza nahīñ

shā.irī ke vāste achchhe bahāne de mujhe

ye chaman sahrā huā hai panchhī bhī ḳhāmosh haiñ

pyaar barsā kar yahāñ bone tarāne de mujhe

daadī naanī kī kahānī meñ sabhī jab Thiik thā

badlā kyoñ merā jahāñ guzre zamāne de mujhe

KHwab chahe KHwab hi ho dil lagane de mujhe

is haqiqat se kabhi to jaan chhuDane de mujhe

inqalab aa ke rahega haq ki hogi jit hi

baiTh mere pas KHud ko warghalane de mujhe

be-tarah tanha hain wo jo ishq ke qail nahin

un ko sine se laga kuchh pal sulane de mujhe

aaj-kal to KHwab bhi aane lage hain aam se

aa bichhaD ja KHwab mein phir gham purane de mujhe

rokna hai KHud ko har kar-e-junun se ab mujhe

yar ab kuchh dost naseh kuchh siyane de mujhe

ghar mein rah kar bhi teri sahra-nawardi kam nahin

apni si diwangi ab ai diwane de mujhe

ishq yak-rangi hua aur gham bhi kuchh taza nahin

shairi ke waste achchhe bahane de mujhe

ye chaman sahra hua hai panchhi bhi KHamosh hain

pyar barsa kar yahan bone tarane de mujhe

dadi nani ki kahani mein sabhi jab Thik tha

badla kyon mera jahan guzre zamane de mujhe