KHwab jaisi hi koi apni kahani hoti

ḳhvāb jaisī hī koī apnī kahānī hotī

yuuñ to barbād na ye apnī javānī hotī

tere aane se chahak uThtā ye vīrāna-e-dil

phir se ābād vahī ravish purānī hotī

rābta rakhā na diyā jā-e-sukūnat kā pata

is tarah bhī hai koī naql-e-makānī hotī

ab mire paas nahīñ koī bhī rone kā javāz

hijr mausam kī sahī ashk fishānī hotī

yaad karne kā tujhe koī bahāna bhī nahīñ

koī chhallā koī chauḌī hī nishānī hotī

ab tire hijr se mānūs tabī.at hai mirī

pahle vaalī sī nahīñ jaañ pe girānī hotī

naḳhl-e-jāñ pe jo barastā terā bādal 'mariyam'

kuchh to kam badan kī ye tishna-dahānī hotī

KHwab jaisi hi koi apni kahani hoti

yun to barbaad na ye apni jawani hoti

tere aane se chahak uThta ye virana-e-dil

phir se aabaad wahi rawish purani hoti

rabta rakha na diya ja-e-sukunat ka pata

is tarah bhi hai koi naql-e-makani hoti

ab mere pas nahin koi bhi rone ka jawaz

hijr mausam ki sahi ashk fishani hoti

yaad karne ka tujhe koi bahana bhi nahin

koi chhalla koi chauDi hi nishani hoti

ab tere hijr se manus tabiat hai meri

pahle wali si nahin jaan pe girani hoti

naKHl-e-jaan pe jo barasta tera baadal 'mariyam'

kuchh to kam badan ki ye tishna-dahani hoti