KHwahish-e-duniya ko manzil ka nishan samjha nahin

ḳhvāhish-e-duniyā ko manzil kā nishāñ samjhā nahīñ

is zamīñ ko maiñ kabhī bhī āsmāñ samjhā nahīñ

jānashīn-e-masnad-e-paiġhambarī hai vo magar

apne rutbe ko amīr-e-kārvāñ samjhā nahīñ

hai itā'at ik taqāza bas mohabbat asl hai

par ye bārīkī mizāj-e-tālibāñ samjhā nahīñ

mo'tariz hai sāqī-e-fitrat kī jo taqsīm par

mumtahin kā vo tarīq-e-imtihāñ samjhā nahīñ

tū haqīqat ko gumāñ kah kar ziyāñ par hai musir

tujh ko maiñ ai sāhib-e-vahm-o-gumāñ samjhā nahīñ

maañ kī bolī ho ga.ī hai ajnabī in ke liye

apne bachchoñ kī bhī maiñ aksar zabāñ samjhā nahīñ

ye to rasta hai diloñ ko ek rakhne kā magar

shā'irī ko ye giroh-e-shā’irāñ samjhā nahīñ

dil hai ummīd-e-sahar se mutma.in ye nā-samajh

zulmat-e-shab kā tilism-e-jāvedāñ samjhā nahīñ

bāvajūd-e-sad-tadabbur 'sayyad'-e-nā-fahm tū

dāstāñ meñ jo chhupī thī dāstāñ samjhā nahīñ

KHwahish-e-duniya ko manzil ka nishan samjha nahin

is zamin ko main kabhi bhi aasman samjha nahin

jaanashin-e-masnad-e-paighambari hai wo magar

apne rutbe ko amir-e-karwan samjha nahin

hai ita'at ek taqaza bas mohabbat asl hai

par ye bariki mizaj-e-taliban samjha nahin

mo'tariz hai saqi-e-fitrat ki jo taqsim par

mumtahin ka wo tariq-e-imtihan samjha nahin

tu haqiqat ko guman kah kar ziyan par hai musir

tujh ko main ai sahib-e-wahm-o-guman samjha nahin

man ki boli ho gai hai ajnabi in ke liye

apne bachchon ki bhi main aksar zaban samjha nahin

ye to rasta hai dilon ko ek rakhne ka magar

sha'iri ko ye giroh-e-sha’iran samjha nahin

dil hai ummid-e-sahar se mutmain ye na-samajh

zulmat-e-shab ka tilism-e-jawedan samjha nahin

bawajud-e-sad-tadabbur 'sayyad'-e-na-fahm tu

dastan mein jo chhupi thi dastan samjha nahin