kis kis ka munh band karoge kis kis ko samjhaoge

kis kis kā muñh band karoge kis kis ko samjhāoge

dil kī baat zabāñ par lā ke dekho tum pachhtāoge

aaj ye jin dīvāroñ ko tum ūñchā karte jaate ho

kal ko in dīvāroñ meñ ḳhud ghuT ghuT ke mar jāoge

maazī ke har ek varaq par sapnoñ kī gul-kārī hai

ham se naata toḌne vaalo kitne naqsh miTāoge

haath chhuḌā ke chal to diye ho lekin itnā yaad rakho

aage aise moḌ mileñge saa.e se Dar jāoge

tum ko ādam-zād samajh ke ham ne haath baḌhāyā thā

kis ko ḳhabar thī chhūte hī tum patthar ke ho jāoge

dil sā maskan chhoḌ ke jaanā itnā bhī āsān nahīñ

sub.h ko rasta bhuul ga.e to shaam ko vāpas aaoge

jism ke kuchh bechain taqāze zabt se bāhar hote haiñ

kab tak dil ko dhokā de kar yādoñ se bahlāoge

kis kis ka munh band karoge kis kis ko samjhaoge

dil ki baat zaban par la ke dekho tum pachhtaoge

aaj ye jin diwaron ko tum uncha karte jate ho

kal ko in diwaron mein KHud ghuT ghuT ke mar jaoge

mazi ke har ek waraq par sapnon ki gul-kari hai

hum se nata toDne walo kitne naqsh miTaoge

hath chhuDa ke chal to diye ho lekin itna yaad rakho

aage aise moD milenge sae se Dar jaoge

tum ko aadam-zad samajh ke hum ne hath baDhaya tha

kis ko KHabar thi chhute hi tum patthar ke ho jaoge

dil sa maskan chhoD ke jaana itna bhi aasan nahin

subh ko rasta bhul gae to sham ko wapas aaoge

jism ke kuchh bechain taqaze zabt se bahar hote hain

kab tak dil ko dhoka de kar yaadon se bahlaoge