kis ko fursat kaun paDhega chehre jaisa sachcha sach

kis ko fursat kaun paḌhegā chehre jaisā sachchā sach

roz adālat meñ chaltā hai khoTā sikka jhūTā sach

ūñche ḳhvāboñ ke tājir se koī nahīñ ye pūchhne vaalā

kaun javānoñ ke chehroñ par likh detā hai piilā sach

ham se kyā pūchhoge sāhab shahr kabhī kā TuuT chukā

shaam kī mailī chādar par hai TukḌe TukḌe phailā sach

un āñkhoñ meñ mustaqbil ke ḳhvāb bhalā kyā utreñge

jin āñkhoñ ne dekh liyā hai vaqt se pahle niilā sach

us ke beTā beTī college usī taraf se jaate haiñ

raat ko jis ne beach saḌak par pheñkā hai ik giilā sach

sab ne ham ko ḳhush-hālī ke ḳhvāb dikhā kar chhoḌ diyā

galiyoñ galiyoñ ghuum rahā hai dhuul meñ lipTā nañgā sach

'badr' tumhārī raah meñ aa kar duniyā jaal bichhā.egī

jo kahte ho kahte rahnā chhoḌ na denā likhnā sach

kis ko fursat kaun paDhega chehre jaisa sachcha sach

roz adalat mein chalta hai khoTa sikka jhuTa sach

unche KHwabon ke tajir se koi nahin ye puchhne wala

kaun jawanon ke chehron par likh deta hai pila sach

hum se kya puchhoge sahab shahr kabhi ka TuT chuka

sham ki maili chadar par hai TukDe TukDe phaila sach

un aankhon mein mustaqbil ke KHwab bhala kya utrenge

jin aankhon ne dekh liya hai waqt se pahle nila sach

us ke beTa beTi college usi taraf se jate hain

raat ko jis ne beach saDak par phenka hai ek gila sach

sab ne hum ko KHush-haali ke KHwab dikha kar chhoD diya

galiyon galiyon ghum raha hai dhul mein lipTa nanga sach

'badr' tumhaari rah mein aa kar duniya jal bichhaegi

jo kahte ho kahte rahna chhoD na dena likhna sach