kis qadar dhyan hai ai kakul-e-pechan tera

kis qadar dhyān hai ai kākul-e-pechāñ terā

apne saaye se ulajhtā hai pareshān terā

apnī hasrat pe lahū ro.e har ik zaḳhm-e-jigar

gir paḌā haath se qātil jo namakdāñ terā

kyā kahūñ hai mire sahrā kī jo vus.at ai qais

na mile us meñ jo kho jaa.e bayābāñ terā

hausla nikle mirī vahshat-e-dil kā kyūñkar

dā.era tang hai ai ālam-e-imkāñ terā

le gayā us kī galī tak na bahā kar lāsha

chashm-e-tar kaam kuchh aaya mire tūfāñ terā

āj-kal chaltī hai duniyā meñ qayāmat kī havā

gul na ho jaa.e charāġh ai mah-e-tābāñ terā

ḳhair ho bū-e-raqābat mujhe aa.ī tujh se

chaak kis ke liye ai gul hai garebāñ terā

kis taraf DhūñDhtā phirtā hai to ai tīr-afgan

dil meñ 'akbar' ne chhupā rakkhā hai paikāñ terā

kis qadar dhyan hai ai kakul-e-pechan tera

apne saye se ulajhta hai pareshan tera

apni hasrat pe lahu roe har ek zaKHm-e-jigar

gir paDa hath se qatil jo namakdan tera

kya kahun hai mere sahra ki jo wusat ai qais

na mile us mein jo kho jae bayaban tera

hausla nikle meri wahshat-e-dil ka kyunkar

daera tang hai ai aalam-e-imkan tera

le gaya us ki gali tak na baha kar lasha

chashm-e-tar kaam kuchh aaya mere tufan tera

aaj-kal chalti hai duniya mein qayamat ki hawa

gul na ho jae charagh ai mah-e-taban tera

KHair ho bu-e-raqabat mujhe aai tujh se

chaak kis ke liye ai gul hai gareban tera

kis taraf DhunDhta phirta hai to ai tir-afgan

dil mein 'akbar' ne chhupa rakkha hai paikan tera