kis tarah lab pe hansi ban ke fughan aati hai

kis tarah lab pe hañsī ban ke fuġhāñ aatī hai

mujh se pūchho mujhe phūloñ kī zabāñ aatī hai

zahr-e-ġham piije to alfāz meñ ras aatā hai

dil ko ḳhuuñ kiije to afkār meñ jaañ aatī hai

ḳhair ho dil kī ki phir lai vahī chheḌī us ne

jaise kashtī kī taraf mauj-e-ravāñ aatī hai

shikan-e-zulf bhī hai husn-e-tarab meñ goyā

khiñch ke har taan meñ tasvīr-e-butāñ aatī hai

baat vo hai jo lab-e-la.al-e-nigārāñ se chale

ḳhuuñ bhī ho dil to ye tāsīr kahāñ aatī hai

phir nazar aatī hai mehrāb-e-haram ḳhālī sī

phir vahī yād-e-butāñ āfat-e-jāñ aatī hai

ḳhush-adāoñ ke suḳhan ek hī saare 'haqqī'

un ko europe meñ bhī dillī kī zabāñ aatī hai

kis tarah lab pe hansi ban ke fughan aati hai

mujh se puchho mujhe phulon ki zaban aati hai

zahr-e-gham pije to alfaz mein ras aata hai

dil ko KHun kije to afkar mein jaan aati hai

KHair ho dil ki ki phir lai wahi chheDi us ne

jaise kashti ki taraf mauj-e-rawan aati hai

shikan-e-zulf bhi hai husn-e-tarab mein goya

khinch ke har tan mein taswir-e-butan aati hai

baat wo hai jo lab-e-lal-e-nigaran se chale

KHun bhi ho dil to ye tasir kahan aati hai

phir nazar aati hai mehrab-e-haram KHali si

phir wahi yaad-e-butan aafat-e-jaan aati hai

KHush-adaon ke suKHan ek hi sare 'haqqi'

un ko europe mein bhi dilli ki zaban aati hai