kisi jawab ki mohlat nahin mili mujhko

kisī javāb kī mohlat nahīñ milī mujh ko

burā na maan suhūlat nahīñ milī mujh ko

isī sukūn ne aadat bigāḌ dī merī

bahut dinoñ se aziyyat nahīñ milī mujh ko

kisī se apne ta.alluq ko ġhaur se dekhā

kisī tarah kī himāqat nahīñ milī mujh ko

meñ is mizāj ke dariyā se ḳhuub vāqif thī

tabhī to pyaas kī shiddat nahīñ milī mujh ko

guzishta raat koī ḳhvāb mar gayā merā

maiñ DhūñDhtī rahī mayyat nahīñ milī mujh ko

jo ab milī hai hamesha rahegī saath mire

vo aarzī thī jo vahshat nahīñ milī mujh ko

kisi jawab ki mohlat nahin mili mujh ko

bura na man suhulat nahin mili mujh ko

isi sukun ne aadat bigaD di meri

bahut dinon se aziyyat nahin mili mujh ko

kisi se apne talluq ko ghaur se dekha

kisi tarah ki himaqat nahin mili mujh ko

mein is mizaj ke dariya se KHub waqif thi

tabhi to pyas ki shiddat nahin mili mujh ko

guzishta raat koi KHwab mar gaya mera

main DhunDhti rahi mayyat nahin mili mujh ko

jo ab mili hai hamesha rahegi sath mere

wo aarzi thi jo wahshat nahin mili mujh ko