kisi ke haq mein sahi faisla hua to hai

kisī ke haq meñ sahī faisla huā to hai

mirā nahīñ vo kisī shaḳhs kā huā to hai

yahī bahut hai ki us ne mujhe bhī miss to kiyā

ye lams mujh meñ abhī tak rachā huā to hai

use maiñ khul ke kabhī yaad kar to saktā huuñ

mujhe ḳhushī hai vo mujh se judā huā to hai

sukūt-e-shab hī sahī merā ham-safar lekin

mire sivā bhī koī jāgtā huā to hai

ghuTan ki baḌhtī chalī jā rahī hai andar kī

tamām ḳhush haiñ ki mausam khulā huā to hai

ye aur baat ki maiñ zinda rah gayā huuñ 'nasīm'

har ik sitam mirī jaañ par ravā huā to hai

kisi ke haq mein sahi faisla hua to hai

mera nahin wo kisi shaKHs ka hua to hai

yahi bahut hai ki us ne mujhe bhi miss to kiya

ye lams mujh mein abhi tak racha hua to hai

use main khul ke kabhi yaad kar to sakta hun

mujhe KHushi hai wo mujh se juda hua to hai

sukut-e-shab hi sahi mera ham-safar lekin

mere siwa bhi koi jagta hua to hai

ghuTan ki baDhti chali ja rahi hai andar ki

tamam KHush hain ki mausam khula hua to hai

ye aur baat ki main zinda rah gaya hun 'nasim'

har ek sitam meri jaan par rawa hua to hai