kisī ko niiñd milī to kisī ko ḳhvāb milā
har ik bashar ko yaañ mauqa-e-intiḳhāb milā
vo naap taul ke paayā thī aarzū jis kī
nahīñ thī aarzū jis kī vo be-hisāb milā
khulā milā koī chehra Dhakā milā koī
sabhī kī zaat pe ham ko magar hijāb milā
naqāb itne haiñ chehra hī bhuul jā.eñge
agar vo shīsha-e-dil meñ na be-naqāb milā
rahe savāl to be-ḳhauf hī hamāre magar
savāl se hameñ sahmā sā har javāb milā
sabhī azāboñ se pahle ye zindagī thī milī
sabhī azāboñ se pahle yahī azaab milā
is iztirāb ke sahrā meñ hai sukūñ kā gumāñ
milā bhī tishnagī ko to yahī sarāb milā
kisi ko nind mili to kisi ko KHwab mila
har ek bashar ko yan mauqa-e-intiKHab mila
wo nap taul ke paya thi aarzu jis ki
nahin thi aarzu jis ki wo be-hisab mila
khula mila koi chehra Dhaka mila koi
sabhi ki zat pe hum ko magar hijab mila
naqab itne hain chehra hi bhul jaenge
agar wo shisha-e-dil mein na be-naqab mila
rahe sawal to be-KHauf hi hamare magar
sawal se hamein sahma sa har jawab mila
sabhi azabon se pahle ye zindagi thi mili
sabhi azabon se pahle yahi azab mila
is iztirab ke sahra mein hai sukun ka guman
mila bhi tishnagi ko to yahi sarab mila
Source:
Word File Mail By Salim Saleem
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.
