kisi nadida shai ki chah mein aksar badalte hain

kisī nādīda shai kī chaah meñ aksar badalte haiñ

kabhī āñkheñ kabhī chehra kabhī manzar badalte haiñ

kisī mahfūz goshe kī talab majbūr kartī hai

makīñ badle nahīñ jaate haiñ so ham ghar badalte haiñ

miyāñ bāzār ko sharminda karnā kyā zarūrī hai

kahīñ is daur meñ tahzīb ke zevar badalte haiñ

ye an-jāne parinde kaun se jangal se aa.e haiñ

jo har parvāz se pahle na.e shahpar badalte haiñ

isī se sūrat-e-hālāt kī tasvīr bantī hai

usī ke Dar se ham log apnā apnā dar badalte haiñ

sitārā sā mirī āġhosh meñ kuchh to chamaktā hai

jhalak paane kī jis ko aa.ine mehvar badalte haiñ

kisi nadida shai ki chah mein aksar badalte hain

kabhi aankhen kabhi chehra kabhi manzar badalte hain

kisi mahfuz goshe ki talab majbur karti hai

makin badle nahin jate hain so hum ghar badalte hain

miyan bazar ko sharminda karna kya zaruri hai

kahin is daur mein tahzib ke zewar badalte hain

ye an-jaane parinde kaun se jangal se aae hain

jo har parwaz se pahle nae shahpar badalte hain

isi se surat-e-haalat ki taswir banti hai

usi ke Dar se hum log apna apna dar badalte hain

sitara sa meri aaghosh mein kuchh to chamakta hai

jhalak pane ki jis ko aaine mehwar badalte hain