kisi to kaam zamane ke sogwar aae

kisī to kaam zamāne ke sogvār aa.e

tujhe jo pā na sake ziist ko sañvār aa.e

thā jis pe va.ada-e-firdaus-o-āqibat kā madār

vo raat ham sar-e-kū-e-butāñ guzār aa.e

tire ḳhayāl pe shab-ḳhūñ to ḳhair kyā karte

bahut huā to ik ochhā sā haat maar aa.e

matā-e-dil hī bachī thī bas ik zamāne se

so ham ise bhī tirī anjuman meñ haar aa.e

baḌe ḳhulūs se ahvāl pūchhne ke liye

guzar ga.ī shab-e-furqat to mere yaar aa.e

kisī ko haal batānā zarūr hī kyā thā

us anjuman se ham apne qusūr-vār aa.e

nigāh-e-nāz mire dil ke ghaav par mat jā

ḳhudā kare ki tujhe apnā kārobār aa.e

ye aur baat ki saaqī se qarz mil na sakī

huzūr-e-hazrat-e-yazdāñ to bā-vaqār aa.e

kisi to kaam zamane ke sogwar aae

tujhe jo pa na sake zist ko sanwar aae

tha jis pe wada-e-firdaus-o-aqibat ka madar

wo raat hum sar-e-ku-e-butan guzar aae

tere KHayal pe shab-KHun to KHair kya karte

bahut hua to ek ochha sa hat mar aae

mata-e-dil hi bachi thi bas ek zamane se

so hum ise bhi teri anjuman mein haar aae

baDe KHulus se ahwal puchhne ke liye

guzar gai shab-e-furqat to mere yar aae

kisi ko haal batana zarur hi kya tha

us anjuman se hum apne qusur-war aae

nigah-e-naz mere dil ke ghaw par mat ja

KHuda kare ki tujhe apna karobar aae

ye aur baat ki saqi se qarz mil na saki

huzur-e-hazrat-e-yazdan to ba-waqar aae