kitni mushkil se taqaza pas-e-guftar khula

kitnī mushkil se taqāzā pas-e-guftār khulā

to kahīñ jā ke ye pairāya-e-iz.hār khulā

kaun vārid huā bastī meñ ki sab saudāgar

chhoḌ ke aa.e haiñ bāzār kā bāzār khulā

sar kahīñ ḳham hai kahīñ pech ulajhte jaa.eñ

tab-e-mad.hosh sambhal halqa-e-dastār khulā

ḳhair hañsne se tumhāre to hai duniyā vāqif

merā girya bhī khulā to pas-e-dīvār khulā

kaise chaḌhte hue sūraj kī parastish hogī

raaz us vaqt khulā ham pe ki jab daar khulā

hadaf-e-chashm-e-siyah 'soz' maiñ banñā chāhūñ

jaa.e ḳhālī na kisī taur koī vaar khulā

kitni mushkil se taqaza pas-e-guftar khula

to kahin ja ke ye pairaya-e-izhaar khula

kaun warid hua basti mein ki sab saudagar

chhoD ke aae hain bazar ka bazar khula

sar kahin KHam hai kahin pech ulajhte jaen

tab-e-madhosh sambhal halqa-e-dastar khula

KHair hansne se tumhaare to hai duniya waqif

mera girya bhi khula to pas-e-diwar khula

kaise chaDhte hue suraj ki parastish hogi

raaz us waqt khula hum pe ki jab dar khula

hadaf-e-chashm-e-siyah 'soz' main banna chahun

jae KHali na kisi taur koi war khula