koi bhi naqsh salamat nahin hai chehre ka

koī bhī naqsh salāmat nahīñ hai chehre kā

badal gayā hai kuchh aisā chalan zamāne kā

maiñ kis liye tujhe ilzām-e-bevafā.ī duuñ

ki maiñ to aap hī patthar huuñ apne raste kā

koī hai rañg koī raushnī koī ḳhushbū

judā judā hai ta.assur har ek lamhe kā

vo tīrgī hai musallat ki āsmānoñ par

surāġh tak nahīñ miltā kisī sitāre kā

ġhazab to ye hai muqābil khaḌā hai vo mere

ki jis se merā ta.alluq hai ḳhuuñ ke rishte kā

tanā huā hai vahāñ aaj ḳhema-e-ḳhurshīd

ugā huā thā jahāñ kal daraḳht saa.e kā

vo jā chukā hai rupahlī rutoñ ke saath magar

bhaḌak rahā hai abhī tak charāġh siine kā

guzar rahe haiñ ye kis pul-e-sirāt se ham log

ki dil meñ 'tāb' gumāñ tak nahīñ hai jiine kā

koi bhi naqsh salamat nahin hai chehre ka

badal gaya hai kuchh aisa chalan zamane ka

main kis liye tujhe ilzam-e-bewafai dun

ki main to aap hi patthar hun apne raste ka

koi hai rang koi raushni koi KHushbu

juda juda hai tassur har ek lamhe ka

wo tirgi hai musallat ki aasmanon par

suragh tak nahin milta kisi sitare ka

ghazab to ye hai muqabil khaDa hai wo mere

ki jis se mera talluq hai KHun ke rishte ka

tana hua hai wahan aaj KHema-e-KHurshid

uga hua tha jahan kal daraKHt sae ka

wo ja chuka hai rupahli ruton ke sath magar

bhaDak raha hai abhi tak charagh sine ka

guzar rahe hain ye kis pul-e-siraat se hum log

ki dil mein 'tab' guman tak nahin hai jine ka